Songtext zu 'Hartleed' von Hannes Wader

Wat weenst du di de Ogen ut?
Segg an: wat deit di weh?
Is Vader krank, is Moder krank?
Is Bruder ut to See?
Is Vader krank, is Moder krank?
Is Bruder ut to See?

„Och ne! Mit Vader hett' keen Noth
Un Moder spinnt dat Flass
Doch weert em beter, weer he dot
Un ünnert gröne Gras
Doch weert em beter, weer he dot
Un ünnert gröne Gras

Ja beter leeg he kold un still
Al ünnern Likensteen
De Wind is lud, de See is wild -
Un ik mutt weenn un weenn
De Wind is lud, de See is wild -
Un ik mutt weenn un weenn."

Un gung de See ok noch so krus
Un noch so arg to Kehr:
Al menni Schipper keem to Hus
De lang vergeten weer
Al menni Schipper keem to Hus
De lang vergeten weer

So ween di nich de Ogen blank
Un wisch di man de Thran'n
En junge Blot, en nie Plank
De ward ni ünnergan
En junge Blot, en nie Plank
De ward ni ünnergan

„Un leeg he inne depe See,
Dat weer em wul to günn'
Dar hör he nix vun Angst un Weh
Un Schimp un Schann un Sünn!
Dar hör he nix vun Angst un Weh
Un Schimp un Schann un Sünn! -

Dar keemn Soldaten, blink un blank
De weern so smuck to sehn
Dar gungn Soldaten flink un frank
Do fung ik an to ween
Dar gungn Soldaten flink un frank
Do fung ik an to ween

Un ween mi noch de Ogen ut
Un bün so hartsbedröft
He weer so junk, he weer so gut
Ik harr em Allens glövt
He weer so junk, he weer so gut
Ik harr em Allens glövt

He weer so junk, he weer so slank
He sä, he keem so bald
Nu hör ik al de Weken lank
Wa Lof un Blaeder fallt
Nu hör ik al de Weken lank
Wa Lof un Blaeder fallt

Un kumt he nu un nimmermehr
Wo schall ik eenmal hin!
So sack ik as dat Lof na Eer
Vaer Schimp un Schann un Sünn!
So sack ik as dat Lof na Eer
Vaer Schimp un Schann un Sünn!"