Songtext zu 'Schwammerl Brocking Talking Blues' von Querschläger

znaxt håmb se in fernsehn gsågt
a jeda braucht an sport
a jeda sollt wås fi sein körpa toa
und i hå ma denkt ba mir
jå eigentlich wa s noat
weil i sist glei ummanånda loan
wås fia sportårt sollt i måchn
i hån echt koan dunst
wås då heit schoa ålls zan sportln gibt
wånn si då wer auskennt
nåchand is des fåst schoa kunst
då brauchst echt an top-experten-tipp

i bin glei mit n auto
in de shopping city gfåhrn
und hå ma so an top-expertn gfasst
in da sportåbteilung
ba de trendsportårtn vorn
hå n gfrågt wås er glab wås zu mir passt
er håt mi lång ångschaut
nåchand håt a wås dazählt
va skating boarding carving skooting a
i hå nix vaståndn
åba zuagebn hå I s nid
der hätt sist glab I bin a pumpara

climbing jogging walking
hiking jumping und und und
mein gott wia håt mi des mandl plågt
und irgendwånn dass går wecht
so nåch oan-dreiviertl stund
hån i oafåch: jå, des nimm i gsågt
oida geil des is da letzte trend aus u.s.a
håt a gsågt då bin wa voll dabei
zwischn new york city
phoenix denver und l.a
wa s mushrooming
hiatz da letzte schrei

passt schoa passt schoa is ma wurscht
hiatz såg wås brauch i ålls
wånn i irbat mushrooming geah will
schmeiß ma ålls wås noat is
in a wagei und i zåhls
equipment håt a gsågt brauchst går nid vi
zerscht brauchst glei an basket
und a special mushroom knife
und natürlich a no forest boots
nåchand no a dvd
am bestn: mushroom life
und a vollvisierhelm zu deim schutz

willst a profi musher sei
brauchst s originale gwånd
in military oder wilderness
an echtn zebraledafäustling
fi de linke hånd
und höhenmesser kompass gps
i bin za da kassa gfåhrn
es wagei bis obn voll
fåst 8000 euro hån i zåhlt
åba dafia is hiatz
mei equipment någlnoi
mit garantie dass s 45 jåhr hålt

i glei hoam de dvd
in player eine gschobn
volla eifer tatndrång und biss
weil i wollt schlussendlich
a no wissen und dafrågn
wås hiatz nåchand des mushrooming is
a mushroom is a schwammerl
und a basket is a korb
und a forest is nix wia r wåld
a tree des is a bamerl
und de colour is sei fårb
und dafia hån i wia deppat zåhlt

åba wås a månn is
der gibt nia an fehla zua
i hå tån åls låssat mi des kålt
i bin glei ins zimmer
und i hån meina figur
des någlneie outfit ummagschnållt
i schau glei in spiagl
und i kriag an gscheidn schreck
vor dem wås i då in dem spiagl siehch
a mischung zwischn rotkäppchen
pirat und quarterback
voll danebn und völlig lächerlich

i denk ma hiatz is a scho wurscht
hiatz hau i mi in wåld
i scheiß oanfåch auf wås de nåchban sågn
i schau deppat aus
und hån an haufn dafia zåhlt
und hiatz will i endlich schwammerl håbn
in jungwåld is vü z finsta
und ban båch då is vü z feucht
es scheint ålls wa in gånzn wåld nix los
erscht nåch zwoa drei stund
måch i an juschrei weil es leucht
a winzigs eierschwammerl intan moos

gånz bedächtig geh i zuawe
måch den basket auf
es special mushroom knife in meina hånd
auf oamål kimmt a schattn gflogn
es hupft wer auf mi drauf
i siahg sterndla s hebt mi aus n stånd
touch down touch down mushroom safe
hea s I auf oamål schrein
i lieg am bodn und bin no völlig gschockt
und i siahg an typn vor mir
üba n bodn kräuln
der mei schwammerl in sein basket påckt

er hoasst helmut
is aus stranach
håt in fernsehn gsehgn
er miassat hiatzt wås fi sein körper toa
er is glei ins auto und nåch sålzburg und deswegn
i såg: heli woaßt dei gschicht de kenn i schoa
späta håbn man erich troffn
en bertl und en gust
ålle in da schwammal-kåmpfmontur
ålle mit an laan basket
und dafia an gscheidn frust
und von sportsgeist nid amål a spur

hiatz treffn ma ins jedn freitåg
weil mir håbn hiatz an varein
usc torpedo schwammerl II
zur pflege der gemeinschaft
und der schwammerlsucherreinkultur
weil dågibt s no vi zan toa
den sport den håmma låssn
er is z gfährlich und z brutal
des gånze steaht si oafåch nid dafia
åba mia geahn laut statut
jedn freitåg gånz banal
nåchn schwammerlsuachn auf a bier
åba mia geahn laut statut
jedn freitåg gånz banal
schwammerlsuachn oda auf a bier
åba mia geahn laut statut
jedn freitåg gånz banal
ståttn schwammerlsuachn auf a bier